സുരക്ഷാ പിഴവ്: വാട്‌സ്ആപ്പ് ഉപയോക്താക്കൾക്ക് മുന്നറിയിപ്പുമായി കേന്ദ്ര ഏജൻസി, എങ്ങനെ സുരക്ഷ ഉറപ്പാക്കാം

വാട്‌സ്ആപ്പ് ഉപയോക്താക്കൾക്ക് സുരക്ഷാ മുന്നറിയിപ്പുമായി കേന്ദ്ര ഏജൻസി. വാട്‌സ്‌ആപ്പിലെ സുരക്ഷാ പഴുത് മുതലെടുത്താൽ ഹാക്കർമാർക്ക് ഫോണിന്റെ സുരക്ഷാ സംവിധാനങ്ങൾ മറികടന്ന് ഉപയോക്താക്കൾക്ക് വലിയ നാശനഷ്ടങ്ങൾ ഉണ്ടാക്കാൻ സാധിക്കുമെന്നാണ് മുന്നറിയിപ്പ്. ആപ്പിൾ ഉപയോക്താക്കളെയാവും സുരക്ഷാ പ്രശ്നം പ്രധാനമായും ബാധിക്കുക. ഐഫോൺ, മാക് പതിപ്പുകൾ ഇതിൽ ഉൾപ്പെടും.

കേന്ദ്ര ഏജൻസിയായ ഇന്ത്യൻ കമ്പ്യൂട്ടർ എമർജൻസി റെസ്പോൺസ് ടീമിന് (CERT-In) ഈ ഭീഷണിയെക്കുറിച്ച് മുന്നറിയിപ്പ് ലഭിച്ചിരുന്നു. ഇതേത്തുടർന്നാണ് അപകടസാധ്യത സംബന്ധിച്ച മുന്നറിയിപ്പ് പുറത്തിറക്കിയിട്ടുള്ളത്. ചാറ്റിനും ചിത്രങ്ങളടക്കം അയയ്ക്കുന്നതിനും മെസേജിംഗ് ആപ്പിനെ ആശ്രയിക്കുന്ന കോടിക്കണക്കിന് ഉപയോക്താക്കളെ ബാധിക്കാൻ സാധ്യതയുള്ളതാണ് സുരക്ഷാ വീഴ്ചയെന്ന് ദേശീയ മാധ്യമങ്ങൾ റിപ്പോർട്ടുചെയ്യുന്നു.

റിച്ച് റെസ്പോൺസ് മെസേജുകളുടെ അപൂർണമായ പരിശോധനയാണ് വാട്‌സ്ആപ്പിലെ ഈ സുരക്ഷാ പിഴവ് കാരണം. ഒരു ഹാക്കർക്ക് ഈ പിഴവ് മുതലെടുത്ത് മറ്റൊരാളുടെ ഫോണിൽ ഏതെങ്കിലും URL-ൽ നിന്നുള്ള ഉള്ളടക്കം പ്രോസസ് ചെയ്യാൻ നിർദേശിക്കാൻ കഴിയുമെന്ന് CERT-In സുരക്ഷാ ബുള്ളറ്റിനിൽ പറയുന്നു.

അതിനിടെ, നവംബറിലെ അപ്ഡേറ്റുമായി ബന്ധപ്പെട്ട് വാട്‌സ്‌ആപ്പ് സ്വന്തം സുരക്ഷാ വിവരങ്ങൾ പുറത്തുവിട്ടിട്ടുണ്ട്.

ഐഒഎസിനായുള്ള വാട്‌സ്ആപ്പിന്റെ v2.25.23.73-ന് മുമ്പുള്ള പതിപ്പുകളിലും, ഐഒഎസിനായുള്ള വാട്സ്ആപ്പ് ബിസിനസ്സിന്റെ v2.25.23.82-ലും, മാക്കിനായുള്ള വാട്സ്ആപ്പിന്റെ v2.25.23.83-ലും ഉള്ള റിച്ച് റെസ്പോൺസ് മെസേജുകളുടെ അപൂർണമായ പരിശോധന മറ്റൊരു ഉപയോക്താവിന്റെ ഉപകരണത്തിൽ ഇഷ്‌ടമുള്ള ഒരു URL-ൽ നിന്നുള്ള മീഡിയ ഉള്ളടക്കം പ്രോസസ് ചെയ്യാൻ ഒരു ഉപയോക്താവിനെ അനുവദിച്ചേക്കാമെന്ന് അവർ ഒരു പോസ്റ്റിൽ സമ്മതിക്കുന്നു.

ഈ സുരക്ഷാ പിഴവുകൾ ആപ്പിൾ ഉപകരണങ്ങളെ കേന്ദ്രീകരിച്ചാണ്.

എന്നാൽ ഈ സുരക്ഷാ പ്രശ്‌നം ഇതുവരെ ചൂഷണം ചെയ്യപ്പെട്ടിട്ടില്ലെന്നും അതുസംബന്ധിച്ച യാതൊരു തെളിവുകളും ലഭിച്ചിട്ടില്ലെന്നും വാട്‌സ്ആപ്പ് അവകാശപ്പെടുന്നു.

ജാഗ്രതവേണം

വാട്സ്ആപ്പ് ഉപയോക്താക്കൾ താഴെ പറയുന്നവയ്ക്ക് മുമ്പുള്ള പതിപ്പുകളാണ് ഉപയോഗിക്കുന്നതെങ്കിൽ അപകട സാധ്യത കണക്കിലെടുത്ത് ജാഗ്രത പാലിക്കേണ്ടതുണ്ട്.

ഐഒഎസിനായുള്ള വാട്‌സ്ആപ്പ് പതിപ്പ് 2.25.23.73-ന് മുമ്പുള്ളവ

ഐഒഎസിനായുള്ള വാട്‌സ്ആപ്പ് ബിസിനസ്സ് പതിപ്പ് 2.25.23.82-ന് മുമ്പുള്ളവ

മാക്കിനായുള്ള വാട്‌സ്‌ആപ്പ് പതിപ്പ് 2.25.23.83-ന് മുമ്പുള്ളവ

നിങ്ങൾ ചെയ്യേണ്ടത് ഇതാണ്

നിങ്ങളുടെ ഐഒഎസ് അല്ലെങ്കിൽ മാക് ഉപകരണത്തിൽ വാട്‌സ്ആപ്പിന്റെ ഏറ്റവും പുതിയ പതിപ്പ് ഉടൻ തന്നെ ഇൻസ്റ്റാൾ ചെയ്യേണ്ടത് അത്യാവശ്യമാണ്. ഇതിനുവേണ്ടി നിങ്ങൾ ചെയ്യേണ്ടത് ഇതാണ്:

മുകളിൽ വലതുവശത്തുള്ള പ്രൊഫൈൽ ചിത്രത്തിൽ ക്ലിക്ക് ചെയ്യുക

താഴേക്ക് സ്ക്രോൾ ചെയ്‌ത്‌ 'App Update' തിരഞ്ഞെടുക്കുക

ഏറ്റവും പുതിയ പതിപ്പ് പരിശോധിച്ച് ഇൻസ്റ്റാൾ ചെയ്യുക

നിങ്ങൾക്ക് ആപ്പ് സ്റ്റോറിലേക്ക് പോയി ഇൻസ്റ്റാൾ ചെയ്ത്‌ത വാട്‌സ്‌ആപ്പ് പതിപ്പ് പരിശോധിച്ച് നിങ്ങളുടെ ആപ്പിൾ ഉപകരണത്തിനായി ഏറ്റവും പുതിയ അപ്ഡേറ്റ് നേടാനും കഴിയും.